डिभिजन वन कार्यालय सिन्धुलीका रेञ्जर राजकुमार मतारा “गणेश बहादुर शाही राष्ट्रिय संरक्षण पुरस्कार” बाट पुरस्कृत हुनु भएको छ । वन तथा भुसंरक्षण विभागबाट वन क्षेत्रका कर्मचारीलाई प्रदान गरिने उक्त प्रतिष्ठित पुरस्कारमा प्रथम स्थान हासिल गर्दै रेञ्जर मतारा नगद एक लाख राशीको पुरस्कार सहित पुरस्कृत हुनु भएको हो । वन तथा वातावरण संरक्षण क्षेत्रमा उत्कृष्ट योगदान पुर्याए वापत रेञ्जर मतारालाई विभागले प्रथम पुरस्कार स्वरुप एक लाख नगद सहित सम्मान गरेको हो । पुरस्कार पाउनु आफ्नो व्यक्तिगत उपलब्धि मात्र नभई सम्पूर्ण डिभिजन वन कार्यालय सिन्धुली परिवारको सामूहिक मेहनत, विश्वास, साथ, सहयोग र प्रेरणाको प्रतिफल भएको मताराको भनाई छ ।  यस्तै सामुदायिक वन उपभोक्ता समुहका पदाधिकारी, उपभोक्ता लगायत अन्य सरोकारवाला बाट समेत प्रत्यक्ष–अप्रत्यक्ष रूपमा भएको साथ र सहयोगले सफलता मिलेको उहाँको भनाई छ ।  

वन संरक्षण, जैविक विविधता संरक्षण तथा प्राकृतिक स्रोतको दिगो व्यवस्थापनमा अझ इमान्दार, जिम्मेवार र समर्पित भएर कार्य गर्न थप प्रेरणा र दायित्व प्रदान भएको पनि उहाँको बुझाई छ ।