नेपाली मौलिक लोकसंगीतको क्षेत्रमा निरन्तर सक्रिय रहँदै आएका गायिका स्मृति गौतम र चर्चित काठे लोकदोहोरी गायक सरोज लामिछानेको स्वर तथा प्रस्तुतिमा नयाँ मौलिक काठे लोकदोहोरी गीत ‘निष्ठुरे’ सार्वजनिक भएको छ ।
मौलिक काठे भाकाको मिठाससँगै प्रेम, सम्बन्ध, मिलन–बिछोड र ग्रामीण जीवनका यथार्थलाई कथात्मक ढंगले प्रस्तुत गरिएको ‘निष्ठुरे’ले सार्वजनिक भएसँगै लोकसंगीतप्रेमी दर्शक–श्रोतामाझ चर्चा बटुल्न थालेको छ । पछिल्लो समय मौलिक लोकभाका र स्थानीय परिवेशलाई केन्द्रमा राखेर सिर्जना भइरहेका गीतमध्ये ‘निष्ठुरे’ले फरक स्वाद पस्कने प्रयास गरेको छ ।

प्रेम सम्बन्धमा आउने उतारचढाव, मनका पीडा, जीवनका संघर्ष र गाउँघरका सामाजिक परिवेशलाई गीतको कथासँग जोडिएको छ। सरल शब्द, मौलिक लय र भावनात्मक प्रस्तुतिले गीतलाई श्रोता–दर्शकसँग सहजै जोड्ने आधार दिएको छ । गीतको म्युजिक भिडियोमा सिन्धुपाल्चोकको मेलम्ची, इन्द्रावती, फटकशिलालगायतका ग्रामीण तथा प्राकृतिक क्षेत्रका दृश्यलाई प्रमुखताका साथ समेटिएको छ । काभ्रेको सिपाघाट आसपासका दृश्यसमेत समेटिएकाले भिडियोमा स्थानीय जीवनशैली, प्राकृतिक सौन्दर्य र ग्रामीण परिवेशको सुन्दर संयोजन देख्न सकिन्छ ।
‘निष्ठुरे’को शब्द तथा लय सरोज लामिछानेले तयार पारेका हुन् भने संगीत संयोजन रामकृष्ण थापाको रहेको छ । गीतमा सरोज लामिछाने र स्मृति गौतमले स्वर दिएका छन् । लामिछानेको काठे लोकदोहोरीमा स्थापित शैली र गौतमको भावनात्मक गायकीको संयोजनले गीतलाई थप आकर्षक बनाएको छ। भिडियोमा आयुष्मा कार्की, आर.के. परियार र दीपक रिजालको अभिनय रहेको छ। खमेश श्रेष्ठको निर्देशनमा तयार भएको भिडियोको छायांकन रामकृष्ण कँडेलले गरेका हुन्। मेकअपमा डी.के. हमाल, ड्रोन क्यामेरामा उमेश शाह तथा सम्पादनमा कल्पेश विश्वकर्माको योगदान रहेको छ।

स्मृति गौतमले यसअघि पनि मौलिक लोकसंगीतमार्फत आफ्नो छुट्टै पहिचान बनाउँदै आएकी छन्। लोकभाकाको मिठास, ग्रामीण जीवनका कथा र नेपाली समाजका भावनालाई गीतमार्फत प्रस्तुत गर्दै आएकी गौतमका अघिल्ला सिर्जनाले समेत दर्शक–श्रोताको राम्रो साथ पाएका छन्। त्यसैगरी सरोज लामिछाने काठे लोकदोहोरी क्षेत्रमा आफ्ना मौलिक भाका, शब्द र प्रस्तुतीकरणका कारण परिचित नाम हुन्। दुवै कलाकारको सहकार्यले ‘निष्ठुरे’लाई थप अपेक्षासहितको प्रस्तुतिका रूपमा अघि सारेको छ।

पछिल्ला वर्षहरूमा मौलिक लोकदोहोरीको स्थानमा आधुनिक शैली र प्रयोग बढिरहेका बेला ‘निष्ठुरे’ले भने गाउँको माटो, स्थानीय परिवेश र नेपाली मौलिक लोकभाकाको स्वादलाई केन्द्रमा राखेको छ। यही कारण गीतले मौलिक लोकसंगीतलाई माया गर्ने नयाँ तथा पुराना पुस्ताका श्रोतालाई एकसाथ जोड्ने अपेक्षा गरिएको छ।
स्मृति गौतमको आफ्नै YouTube च्यानलमार्फत सार्वजनिक गरिएको ‘निष्ठुरे’ अहिले दर्शक–श्रोताको प्रतिक्रियासँगै अघि बढिरहेको छ। प्रेमको कथा मात्र नभई गाउँले जीवनका भोगाइ, सम्बन्धका संवेदना र नेपाली समाजको मौलिक परिवेशलाई संगीतमा उतार्ने प्रयासका रूपमा ‘निष्ठुरे’ले नेपाली लोकसंगीतमा आफ्नो छुट्टै छाप छोड्ने लक्ष्य लिएको छ ।