सिन्धुली, साउन २३ २०८३, शनिबार । 
सिन्धुलीको फिक्कल गाउँपालिका २ नवलपुर स्थित सुनकोशी नदीमा कार सहित बेपत्ता भएका तीन जनाको खोजी कार्य साउन २५ गते अर्थात पर्सी सोमबार सम्म गरिने भएको छ । फिक्कल गाउँपालिकामा स्थानिय जनप्रतिनिधी, प्रमुख जिल्ला अधिकारी सहित जिल्ला स्थित सुरक्षा निकायका प्रमुख र पीडित परिवारका सदस्य बिच शुव्रmबार भएको छलफल बाट यस्तो निर्णय गरिएको हो । 
सोमबार दिउँसो १ बजे सम्म गोताखोर टोली, ड्रोन तथा म्याग्नेट सहित उपलब्ध सबै आधुनिक प्रविधि प्रयोग गरी खोजी कार्यलाई निरन्तरता दिइने बैठकको निर्णय भएको प्रमुख जिल्ला अधिकारी स्किम श्रेष्ठको भनाई छ । दुर्घटना पछि लगातार पाँच दिन सम्म सशस्त्र प्रहरी बलको विपत् व्यवस्थापन बेस क्याम्प खुर्कोटका गोताखोर, नेपाल प्रहरी र स्थानीय वासीको संयुक्त टोलीले खोजी जारी राखे पनि हाल सम्म बेपत्ता यात्रु तथा कार फेला पार्न सकिएको छैन । सुनकोशी नदीमा पानीको बहाब अत्यधिक तीव्र हुनु, नदी धमिलो हुनु र गहिराइका कारण गोताखोरलाई खोजी कार्यमा कठिनाइ भइरहेको छ ।  
साउन १८ गते काठमाडौँबाट ओखलढुङ्गातर्फ जाँदै गरेको बसले कारलाई ठक्कर दिए पछि दुर्घटना भएको थियो । दुर्घटना पछि कारमा सवार सिन्धुपाल्चोकको जुगल गाउँपालिका–७ निवासी ३९ वर्षीय निर्माण व्यवसायी दिलकुमार लामा, सिन्धुलीको गोलन्जोर गाउँपालिका–१ निवासी २८ वर्षीय गणेश थापा र तीनपाटन गाउँपालिका–९ डाँडाखर्क निवासी १७ वर्षीय सुजन बलम्पाकीमगर हाल सम्म बेपत्ता हुनु भएको छ ।