कमलामाई नगरपालिका ५ सिन्धुलीमा रहेको स्वर्णिम भविष्य बचत तथा ऋण सहकारी संस्था लिमिटेडले सदस्यता बृद्धी र सदस्यता राहत कार्यक्रमलाई प्राथमिकतामा राखेको छ । आज भएको  १८ औँ वार्षिक साधारण सभामा २ हजार ५ सय १४ सदस्य रहेकोमा त्यसलाई बढाएर २ हजार ८ सय ५० पुर्याउने लक्ष्य राखेको छ । यस्तै दैवी विपत्तीमा परेका सदस्यलाई दिइने राहत रकम र महिला सदस्य सुत्केरी भत्तालाई पनि प्राथमिकतामा राखेको संस्थाले जनाएको छ । संस्थाका अध्यक्ष कृष्ण बहादुर श्रेष्ठको अध्यक्षता तथा कमलामाई नगरपालिकाका उपप्रमुख मञ्जु देवकोटाको प्रमुख आतिथ्यतामा भएको साधारण सभामा संस्थाको कारोबारमा बृद्धी गर्दै लैजाने लक्ष्य राखिएको छ ।  सभामा संस्थाको वार्षिक प्रगति, आर्थिक प्रगती, आगामी योजना तथा सहकारीको समग्र विकासका विषयलाई सुधार गर्दै लैजाने लक्ष्य राखिएको हो । साधारण सभा मार्फत संस्थाले सदस्यको बचत सुरक्षित गर्दै आवश्यकता अनुसार ऋण प्रवाह तथा सहकारीको सेवा थप प्रभावकारी बनाउने प्रतिबद्धता जनाएको छ ।

कार्यक्रममा सहकारी सञ्चालनका क्रममा प्रत्यक्ष वा अप्रत्यक्ष रुपमा सहयोग गर्ने महानुभालाई सम्मान गरिएको व्यवस्थापक मोहन बहादुर श्रेष्ठले जानकारी दिनुभयो  । कार्यक्रमको उद्घाटन सत्रमा उपप्रमुख मञ्जु देवकोटा सहित, नगरपालिका भूमी तथा सहकारी शाखा प्रमुख मुकेश तामाङ, जिल्ला सहकारी संघका महासचिव बलराम अधिकारी, अन्य विभिन्न सहकारी संघ संस्थाका प्रमुख तथा प्रतिनिधी लगायतले शुभकामना मन्तव्य राख्नु भएको थियो ।