सिन्धुलीको तीनपाटन गाउँपालिका वडा नम्वर ५ मा टोल–टोलमै पुगेर सामाजिक सुरक्षा भत्ता नवीकरण गर्ने अभियान सञ्चालन गरिएको छ । सामाजिक सुरक्षा भत्ता प्राप्त गर्ने ज्येष्ठ नागरिक तथा अन्य लाभग्राहीलाई सहज सेवा उपलब्ध गराउने उद्देश्यले टोल–टोलमै पुगेर सामाजिक सुरक्षा भत्ता नवीकरण गर्ने अभियान सञ्चालन गरिएको हो । चालु आर्थिक बर्ष २०८३।०८४ का लागि वडाको भुतिया टोल बाट भत्ता नविकरण गर्ने काम शुरु गरिएको वडा कार्यालयले जनाएको छ । वडा कार्यालय सम्म पुग्न कठिन हुने ज्येष्ठ नागरिक, अशक्त तथा अपाङ्गता भएका लाभग्राहीलाई लक्षित गर्दै सम्बन्धित वडाले घरदैलो तथा टोल स्तरमै पुगेर नवीकरणको सेवा प्रदान गरेको हो । यसबाट लाभग्राहीलाई वडा कार्यालय सम्म धाउनुपर्ने र लामो समय कुर्नु पर्ने समस्या कम भएको स्थानिय प्रज्वल कुमार मगरले जानकारी दिनुभयो । यस्तै टोलमै पुगेर सेवा पाएपछि ज्येष्ठ नागरिक तथा अशक्त लाभग्राहीले सहज महसुस गरेका पनि उहाँको भनाई छ ।

वडा कार्यालयले सेवाग्राहीको समय, खर्च र झन्झट घटाउन यस्ता घुम्ती सेवाले महत्वपूर्ण भूमिका खेल्ने जनाएको छ । वडाका जनप्रतिनिधि तथा कर्मचारीहरू लाभग्राहीको घरदैलोमै पुगेर बिहिबार र शुक्रबार आवश्यक विवरण संकलन तथा नवीकरणको प्रक्रिया पूरा गरेका छन । वडाको सबै टोल बस्तीमा पुग्ने अभियान अन्तरगत मंगलबार पुन वडाको टोल बस्ती पुगी सेवा प्रदान गर्ने वडाको तयारी रहेको छ ।