राष्ट्रिय प्रजातन्त्र पार्टी राप्रपाका अध्यक्ष राजेन्द्र लिङ्गदेनले देश झन् ठूलो अन्योल र अनिश्चितताको बाटो तर्फ गई राखेको बताउनु भएको छ । आज राष्ट्रिय प्रजातन्त्र पार्टी सिन्धुलीको आठौं जिल्ला अधिवेशनको उद्घाटन कार्यक्रमलाई संवोधन गर्दै लिङ्गदेनले यस्तो बताउनु भएको हो । कार्यक्रमलाई संवोधन गर्दै लिङ्गदेनले हाल भू–राजनीतिका दृष्टिकोणले  नेपाल झन् ठूलो सङ्कटमा परेको र अन्तर्राष्ट्रिय समुदायमा नेपाल एक्लिँदै जाने अवस्था आएको बताउनुभयो । यस्तो परिस्थिति बनि राख्दा त्यसको नोक्सान सरकारले मात्रै व्यहोर्नु नपर्ने भन्दै उहाँले  त्यसको असर समग्र देशले बेहोर्नु पर्ने बताउनुभयो । त्यसका लागि देशलाई माया गर्ने मानिसहरू चनाखो भई एकताबद्ध भएर उभिनु पर्ने समय आएको उहाँको जिकिर थियो । अहिले देश ठूलो प्राकृतिक विपत्तिको बीचमा मात्र नभएर राजनीति हिसाबले पनि ठूलो विपत्तिको मुखमा रहेको उहाँको भनाई थियो ।

देशको यस्ता अवस्थामा निराश नभई अब राप्रपाले विशेष र विशिष्ट जिम्मेवारी आफ्नो काधमा लिने अध्यक्ष लिङ्गदेनको तर्क थियो । जिल्ला अध्यक्ष भिष्म राज श्रेष्ठको अध्यक्षतामा भएको कार्यक्रममा केन्द्रिय सदस्य जगत गौचन लगायतका नेता कार्यकर्ताले अधिवेशन सफलताको शुभकामना मन्तव्य राख्नु भएको थियो ।