कतारमा क्रियाशील जनप्रगतिशील मञ्च कतार र प्रवासी नेपाली एकता मञ्च कतारबीच ऐतिहासिक एकता भएको छ। दुई संस्थाबीचको एकतापछि ‘अन्तर्राष्ट्रिय नेपाली मञ्च, कतार’ नामबाट नयाँ सांगठनिक यात्राको औपचारिक शुभारम्भ गरिएको हो।

एकतासँगै कतारमा रहेका नेपाली समुदायबीच एकता, सहकार्य, सद्भाव र सामाजिक एकतालाई थप मजबुत बनाउने अपेक्षा गरिएको छ। साझा उद्देश्य र सहकार्यको भावनाका साथ अघि बढ्ने नयाँ संस्थाले प्रवासी नेपालीका हित, सामाजिक सरोकार तथा समुदायका विविध क्षेत्रमा थप प्रभावकारी भूमिका निर्वाह गर्ने बताइएको छ। नयाँ संस्थाको संयोजकको जिम्मेवारी गैरआवासीय नेपाली संघ (एनआरएनए) राष्ट्रिय समन्वय परिषद् कतारका सल्लाहकार राजेन्द्र देवकोटाले प्राप्त गरेका छन्।दुई संस्थाबीचको एकतालाई स्वागत गर्दै एनआरएनए एनसीसी कतारका अध्यक्ष कृष्ण पन्थीले नयाँ संस्थाको गठनलाई सकारात्मक र महत्वपूर्ण कदमका रूपमा लिँदै बधाई तथा शुभकामना व्यक्त गरेका छन्।

अध्यक्ष पन्थीले देवकोटाको नेतृत्वमा अन्तर्राष्ट्रिय नेपाली मञ्च, कतारले नयाँ ऊर्जा, गतिशीलता र प्रभावकारी नेतृत्वका साथ थप उचाइ हासिल गर्ने विश्वास व्यक्त गरे। उनले नयाँ संस्थाको आगामी कार्यकाल उपलब्धिमूलक, सफल र प्रवासी नेपाली समुदायका लागि परिणाममुखी बन्ने शुभकामनासमेत दिएका छन्। दुई संस्थाको एकीकरणलाई कतारमा रहेका नेपाली समुदायबीचको संगठनात्मक एकता र सहकार्यलाई नयाँ उचाइमा पुर्‍याउने महत्वपूर्ण सुरुवातका रूपमा हेरिएको छ।